Velosiped Federasiyasının kubok yarışları – Lənkəranda 

Gənclər və İdman Nazirliyinin dəstəyi, Azərbaycan Velosiped Federasiyasının (AVF), Lənkəran-Astara Regional Gənclər və İdman İdarəsinin təşkilatçılığı ilə şose velosipedinin kriterium növü üzrə Azərbaycan Kuboku yarışının II mərhələsinə start verilib.

Lənkəran şəhərində keçirilən turnirin ilk günündə 46 idmançı Bayraq Meydanı - Heydər Əliyev prospekti – Bayraq meydanı marşrutu (5 və 10 km) üzrə fərdi ötüşmə növündə mübarizə aparıblar. 

2010-2011-ci il təvəllüdlü oğlanlar arasında Timur Rəcəbov (ROEQİUGVM, 09:07:32) birinci, Nizami Cavadlı (Təhsil RİM, 09:45:61) ikinci, Artyom Sokolov (ROEQİUGVM İsmayıllı, 09:53:46) üçüncü yerə, 2009-cu il təvəllüdlülərin mübarizəsində Çingiz İsayev (ROEQİUGVM, 16:30:78) qızıl, Nihad Xudoyev (ROEQİUGVM, 16:47:15) gümüş, Tunar Sadıqlı (Təhsil RİM, 16:58:58) bürünc medala, 2006-2008-ci il təvəllüdlü oğlanların yarışında isə Tural İsrafilov (ROEQİUGVM, 14:05:75) birinci, Artyom Proskuryakov (Təhsil RİM, 15:18:41) ikinci, Ravi Rzayev (ROEQİUGVM, 15:53:12) üçüncü yerə layiq görülüblər.

AVF-nin Gəncə şəhərində fəaliyyət göstərən filialının idmançıları ilk dəfə olaraq rəsmi ölkədaxili yarışa qatılıblar. Onlarla yanaşı, İsmayıllı velosipedçiləri də turnirdə uğurlu mübarizə ilə yadda qalıblar.

Beynəlxalq Velosipedçilər İttifaqının (UCI) mövcud qaydalarına əsasən təşkil edilən turnir sentyabrın 8-də başa çatacaq. Yarışın ikinci günündə idmançılar cüt ötüşmə, üçüncü - sonuncu günündə isə kriterium növü üzrə güclərini sınayacaqlar.

İlk gün yarışlarının mükafatlandırma mərasimində Lənkəran Şəhər İcra Hakimiyyəti başçısının müavini, İctimai-siyasi və humanitar məsələlər şöbəsinin müdiri Ülviyyə Əliyeva, Lənkəran-Astara Regional Gənclər və İdman İdarəsinin rəisi Teymur Babazadə və AVF-nin baş katibi Elnarə Musayeva qaliblərə medal, diplom və qiymətli hədiyyələri təqdim ediblər.

Akif AĞAYEV