CÜDO

--------------------

Gənc cüdoçulardan ibarət yığmamız AÇ-da həm ümumi hesabda, həm də komanda yarışında 4-cü olub

Sentyabrən 7-də Haaqada (Hollandiya) gənc cüdoçular arasında fərdi yarışlarla startı verilən və Azərbaycan komandasının da iştirak etdiyi Avropa çempionatına bu gün baş tutan qarışıq komanda yarışları ilə yekun vurulub. Qeyd edək ki, heyəti Süleyman Əliyev (60 kq), Vüsal Qələndərzadə (73 kq), Vüqar Talıbov, İsmayıl Zamanov (hər ikisi 90 kq), Kənan Nəsibov (+90 kq), Fidan Əlizadə (70 kq), Nigar Süleymanova və Nərmin Əmirlidən (+78 kq) ibarət olan qarış komandamız mübarizəyə qatıldığı 1\8 finalda Rumıniyanı məğlub edib - 4:1. Təəssüflər olsun ki, Azərbasycan 1\4 finalda ev sahibi olan Hollandiyaya 2:4 hesabla uduzub. Bundan sonra təsəlliverişi görüşlərə qatılan yığmamız Ukrayna üzərində eyni hesabla qalib gəlib - 2:4. Bu qələbə yığmamıza Fransaya qarşı 3-cü yer yer uğrunda qarşılaşmaq imkanı verib. Di gəl ki, yığmamız bürünc medal uğrunda gedən mübarizədə 2:4 hesabla uduzub. Bu görüşdə Əlizadə ilə Talıbov öz görüşünü qələbə ilə bitirsə də, Zamanov, Qələndərzadə və Süleymanova məğlub olub. 57 kq-da isə idmançımız tatamiyə çıxmadığı üçün rəqib texniki qələbə qazanıb. Bununla da Azərbaycan qarışıq komanda yarışını 16 komanda arasında 4-cü yerdə bitirib. 

Maraqlıdır ki, Azərbaycan ümimi komanda yarışında da (medal sıralanmasında) 6 (1-2-3) medalla 4-cü olub. AÇ-da ilk 3 yeri isə müvafiq ardıcıllıqla İtaliya (5-1-1), Gürcüstan (3-0-1) və Hollandiya (3-0-0) tutub. 

Azərbaycanın aktivinə yazılan medallara gəlincə, qızıl Nizami İmranovun (60 kq), gümüşlər Aydın Rzayevlə (66 kq) Vüqar Talıbovun (90 kq), "bürünclərsə" Aydan Vəliyeva (52 kq), Vüsal Qələndərzadə (73 kq) və Ömər Rəcəblinin (81 kq) payına düşüb. 

İNTİQAM Məmmədov