FUTZAL

-------------------

Azərbaycanın futzal üzrə yığmasının heyəti açıqlanıb 

Azərbaycanın futzal üzrə yığma komandasını qarşıda DÇ-2024-ün elit-raund mərhələsi çərçivəsində iki mühüm matç gözləyir. Azərbaycan Futzal Federasiyasından verilən məlumata görə, yığmamız sentyabrın 15-də səfərdə Rumıniya, bundan 5 gün sonra isə Bakıda Niderland yığması ilə qarşılaşacaq. Bu məqsədlə də Azərbaycan millisinin təlim-məşq toplanışı başlayıb. Bu gün və sabah Bakıda hazırlıq keçəcək futzalçılarımız sentyabrın 13-də Bakı-İstanbul-Buxarest hava reysi ilə səfərə yollanacaq. İki gün oyunun keçiriləcəyi Buzau şəhərindəki "Romeo lamadi" arenada məşq edəcək komandamız matçın ertəsi gün Bakıya dönəcək. Sentyabrın 17-dən 20-dək hazırlığını Bakı İdman Sarayında reallaşdıracaq millinin baş məşqçisi Vitali Borisov təlim-məşq toplanışına aşağıdakı futzalçıları dəvət edib:

Qapıçılar: Emin Kürdov (“Araz-Naxçıvan”), Rövşən Hüseynli (“Atırau” Qazaxıstan)

Oyunçular: Xətai Bağırov, Amadeu, İsa Atayev, Felipinyo, Xəzər Ağalızadə, Novruz Kazıxanov (hamısı “Araz-Naxçıvan”), Hadi Ahmadi (“Aktobe” Qazaxıstan), Amir Şocaei (“Neftçi” İK), Everton Kardoso “Qallo” (“Manzanares” İspaniya), Rafael Vilela, Eduardo Borges (hər ikisi RSCA Belçika), Oktay Rüstəmli (“Baku Fire”)

Qeyd: DÇ-2024-ün elit-raund mərhələsi çərçivəsində Rumıniya yığması ilə oyuna hazırlıq məqsədi ilə Bakıda təlim-məşq toplanışında olan Azərbaycan millisinin sentyabrın 12-də, saat 11:00-da, "Olimpik star"da ilk 15 dəqiqəsi mətbuat üçün açıq məşqi keçiriləcək. Məşqdən əvvəl – saat 10:45-də isə baş məşqçi Vitali Borisovun iştirakı ilə brifinq təşkil olunacaq.

Qeyd edək ki, Rumıniya – Azərbaycan oyunu sentyabrın 15-də, Buzau şəhərindəki Romeo Lamandi arenada keçiriləcək. Saat 19:30-da başlayacaq qarşılaşma CBC Sport kanalı vasitəsilə canlı yayımlanacaq.

İNTİQAM Məmmədov