VOLEYBOL

----------------

“AZERRAIL” xorvatiyalı hücumçunu transfer edib

Qadın voleybolçulardan ibarət “Azərreyl” klubu yeni mövsüm üçün heyətini formalaşdırmağa davam edir. Bu məqsədlə də "dəmiryolçular" daha bir oyunçunun transferini rəsmiləşdirib. Söhbət xorvatiyalı Katarina Pilepiçdən gedir. Qey edək ki, öz ölkəsinin aşağı yaş qruplarında oynamış 29 yaşlı hücumçu ilə "Azərreyl"lə 1 illik müqavilə imzalayıb.

183 sm boya malik voleybolçu Azərbaycandan öncə bir neçə ölkədə də legioner həyatı yaşayıb. Onun Xorvatiyada ilk peşəkar klubu “Riyeka” olub. Pilepiç 2009-2013-cü illərdə bu komandanın şərəfini qoruyub. Hücumçu ardınca ABŞ-a yollanıb və oarada “San Fransisko Universiteti” (2013-2015) və “Arizona Universiteti”nin (2015-2016) formasını geyinib.

Pilepiç 2016/2017 mövsümündə Asiyada - Filippin klubunda çıxış edib. 2 il burada “Lifesavers”in uğurları üçün çalışan “voleybolçu 2018-ci ildə Avropaya qayıdıb və Yunanıstan “ AO Tiras”ında forma geyinib. O, bunun ardından Finlandiyada “Vyesti” (2019-2020) və Çexiyada “Olomouç” (2021) klublarında oynayıb. Pilepiç son 2 mövsümü isə İsraildə Hayfa “Makkabi”sinin şərəfini qoruyub.

"Azərreyl"in rəsmi saytında verilən məlumata görə, Pilepiç karyerasında 4 dəfə Xorvatiya və 1 dəfə İsrail çempionatının qalibi olub. Katarina Çexiya, İsrail və Xorvatiyada ölkə kubokunu da başı üzərinə qaldırıb. Voleybolçunun kolleksiyasında İsrail və Xorvatiya çempionatlarının qızıllaraı ilə yanaşı, gümüş, Çexiya, Yunanıstan və Filippin liqalarının isə bürünc medalları var.

Pilepiç Finlandiyada və Çexiyada mövsümün ən yaxşı hücumçusu da seçilib.

Xatırladaq ki, "dəmiryolçular" xorvatiyalı voleybolçudan öncə daha beş voleybolçu ilə anlaşıb. Bu çeşlikdən isə blokçu Aynur İmanova, toppaylayıcı Raziyə Əliyeva, libero Asiyat Abuyeva və hücumçu Xanım Cəlilova ilə müqavilə yenilənib. 15 yaşlı hücumçu Aişə Alismanovlasa ilk rəsmi müqavilə bağlanıb.

Bir məqamı da qeyd edək ki, ölkəmizi Çağırış kubokunda təmsil edəcək komanda baş məşqçi Cengiz Akarçeşmenə tapşırılıb.

İNTİQAM Məmmədov