CÜDO

--------------

Hidayət Heydərovla Zəlim Tskayev günün qəhrəmanlarıdır

Böyük Dəbilqəninin ikinci günü, iki final və iki qızıl medal

Paytaxt Bakıdakı Milli Gimnastika Arenasında təşkil edilən və Heydər Əliyevin 100 illik yubileyinə həsr olunan cüdo üzrə Böyük Dəbilqə turnirinin ikinci günü də ev sahibi olan Azərbaycan yığması üçün uğurli olub. Qeyd edək, 61 ölkəni təmsil edən 450 tatami ustasının mübarizə apardığı turnirin start günündə biri qızıl, digəri gümüş əyarlı olmaqla iki medal qazanan Azərbaycan yığması ikinci günü isə iki qızıl medalla başa vurub. Günün qəhrəmanları isə Hidayət Heydərovla (73 kq) Zəlim Tskayev (91 kq) olub. Hər iki cüdoçumuz bütün görüşlərini qələbə ilə başa vuraraq turnirn  qalibi adını və qızıl medalını qazanıb. Yeri gəlmişkən, Hidayət çempionluq zirvəsinə gedən yolda müvafiq ardıcıllıqla Askar Narkulovu (Qazaxıstan), Erik Xemanı (B.Britaniya), Aleksandr Rayku (Rumıniya), Şaxram Əhədovu (Özbəristan) və Petru Pelivanini (Moldova) üstələyib. 

Tskayevə gəlincə,  startda Aleks Bartonu (Slovakiya), ardından Alan Xubetsovu (Rusiya) və ispaniyalı Alfonso Urqizo Solanı məğlub edərək 1\4 finala yüksəlib. Bu mərhələdə bolqarıstanlı Qeorqi Qramatikovu, yarımfinalda isə Özbəkistan təmsilçisi Nurbek Murtozoyevi məğlubiyyətə uğradan Zəlim həlledici finalda isə Şamil Borçaşvilini (Avstriya) məğlub edib. 

Bununla da Azərbaycan ev sahibliyi etdiyi Böyük Dəbilqənin ilk iki günündə 3-ü qızıl, biri gümüş əyarlı olmaqla 4 medal qazanıb. Xatırladaq ki, turnirin ilk günü Yaşar Nəcəfov (66 kq) qızıl, Leyla Əliyeva (48 kq) isə gümüş medal əldə edib. 

Sabah turnirə yekun vurulacaq. 

İNTİQAM Məmmədov