Rüstəm İsmayılov:

Tahir Süleymanovun 75 illik yubileyinə həsr olunmuş iclas keçirilib

Azərbaycan Ağsaqqallar Şurasında Qarabağda aparılmış antiterror tədbirlərinin uğurlu nəticələrinə və Şuranının sədr müavini  Tahir Süleymanovun 75 illik yubileyinə həsr olunmuş iclas keçirilib

Sentyabr ayının 25-də Azərbaycan Ağsaqqallar Şurasında Qarabağda aparılmış lokal antiterror tədbirlərinin uğurlu nəticələrinə və Şuranının sədr müavini  Tahir Süleymanovun 75 illik yubileyinə həsr olunmuş iclas keçirilib. Tədbirdə Azərbaycan Ağsaqqallar Şurasının sədri, millət vəkil, professor Eldar Quliyev, Şura sədrinin müavinləri - millət vəkili, akademik Əhliman Əmiraslanov,  millət vəkili, professor Eldar İbrahimov, Bayram Yusifov, professor Vahid Novruzov, Tahir Süleymanov, həmçinin Azərbaycan Ağsaqqallar Şurasının İdarə Heyətinin üzvləri – millət vəkili, professor Aqiyə Naxçıvanlı, professor Misir Mərdanov, o cümlədən Şuranın Aparat rəhbəri Ramin Həsənli, baş məsləhətçi-hüquqşünas Kamal Əliyev, məsləhətçi Zahid Abbasov və başqaları iştirak ediblər.
Azərbaycanın ərazi bütövlüyü uğrunda canından keçmiş şəhidlərimizin xatirəsi 1 dəqiqəlik sükutla yad edildikdən sonra Eldar Quliyev müzəffər Ali Baş Komandan cənab İlham Əliyevin rəhbərliyi ilə şanlı Ordumuzun Qarabağda sürətlə və uğurla həyata keçirdiyi lokal antiterror əməliyyatlarından bəhs edib. Vurğulayıb ki, 44 günlük Vətən müharibəsindən sonra yenə də Ermənistanın tutduğu ədalətsiz mövqe Qarabağ probleminin dinc yolla tam olaraq həll edilməsinə imkan verməyib. Azərbaycanın möhtəşəm Zəfərindən sonra 10 noyabrda imzalanan üçtərəfli Bəyanata əməl etməyən Ermənistan separatçılığını davam etdirərək öz silahlı qüvvələrini və texnikasını ərazilərimizdən çıxarmayıb. Nəticədə bölgədə dəfələrlə hərbi təxribatlar və terror aktları törədildiyini qeyd edən natiq bildirib ki, Ermənistanın Azərbaycana qarşı apardığı davamlı cinayətlərə son qoymaq üçün  Silahlı Qüvvələrimiz  bölgədə lokal xarakterli antiterror əməliyyatına başlayıb və suveren hüquqlarımız çərçivəsində 23 saat 43 dəqqiqə ərzində həyata keçirilən bu antiterror tədbirləri nəticəsində qanunsuz silahlı qüvvələr ağ bayraq qaldıraraq təslim olublar. Bu növbəti möhtəşəm qələbənin Azərbaycan Respublikasının Prezidenti, müzəffər Ali Baş Komandan cənab İlham Əliyevin yüksək sərkərdəlik qabiliyyəti və qüsursuz diplomatiyası sayəsində əldə edildiyini   və bu gün bütün xalqımızın qürur hissi keçirdiyini deyən Eldar Quliyev əmin olduğunu vurğulayıb ki, böyük quruculuq işləri tezliklə bütün Qarabağı əhatə edəcəkdir. Sonda Eldar müəllim şəhid olmuş qəhrəman Azərbaycan övladlarına bir daha Allahdan rəhmət diləyib, onların ailələrinə, valideynlərinə, doğmalarına və bütün xalqımıza  dərin hüznlə başsağlığı verib.
Azərbaycan Ağsaqqallar Şurasının sədr müavini, millət vəkili, professor Eldar İbrahimov da öz çıxışında uğurlu antiterror əməliyyatlarından söhbət açaraq bildirib ki, artıq Azərbaycanın ərazi problemi tamamilə öz həllini tapıb. Müzəffər Ali Baş Komandan cənab İlham Əliyevin başçılığı altında qəhrəman əsgər və zabitlərimiz antiterror tədbirləri nəticəsində ərazi bütövlüyümüzü tamamilə təmin ediblər və bu münasibətlə hər birinizi və bütün Azərbaycan xalqını ürəkdən təbrik edirəm.
Azərbaycan Ağsaqqallar Şurası sədrinin birinci müavini, millət vəkili, akademik Əhliman Əmiraslanov rəşadətli Ordumuzun həyata keçirdiyi antiterror əməliyyatının hərb tariximizin ən şanlı səhifəsinə çevrildiyini qeyd edib. Bu əməliyyatlar sayəsində əldə olunan Qələbənin 44 günlük Vətən müharibəsində qazanılan Zəfərin davamı olduğunu bildirib. Əlavə edib ki, dövlət başçısı cənab İlham Əliyev xilaskar Prezident, müzəffər Ali Baş Komandan kimi adını Azərbaycan tarixinə qızıl hərflərlə yazdırıb.
    Sonra çıxış edən digər natiqlər də Ermənistan silahlı qüvvələrinin təxribatlarının qarşısını almaq üçün aparılan antiterror tədbirlərinın uğurla nəticələndiyini bildirərək vurğulayıblar ki, bu tədbirlər zamanı Azərbaycan hərbçiləri yenə də yüksək peşəkarlıq nümayiş etdiriblər. Müzəffər Ali Baş Komandan cənab İlham Əliyevin göstərişlərinə uyğun olaraq Silahlı Qüvvələrimiz heç bir mülki şəxsə ziyan vurmadan döyüş tapşırıqlarını qüsursuz şəkildə yerinə yetiriblər.  23 saatdan bir az artıq davam edən antiterror əməliyyatları nəticəsində bütün ərazilərimizdə suverenlik tam bərpa edilib. 
Tədbirdə, həmçinin, qərara alınıb ki, Azərbaycan Respublikasının Prezidenti, müzəffər Ali Baş Komandan cənab İlham Əliyevə Şuranın bütün üzvləri adından təbrik məktubu ünvanlansın.
Daha sonra Azərbaycan Ağsaqqallar Şurasının sədri, millət vəkil, professor Eldar Quliyev bu günlərdə 75 yaşı tamam olan Şuranın sədr müavini Tahir Süleymanovun ölkəmizin ictimai-siyasi həyatında xidmətlərinə görə Azərbaycan Respublikasının Prezidenti cənab İlham Əliyev tərəfindən 1-ci dərəcəli “Vətənə xidmətə görə” ordeni ilə təltif olunduğunu qeyd edərək, göstərilən bu diqqətə görə İdarə Heyətinin bütün üzvləri adından dövlət başçısına minnətdarlığını bildirib.  Eldar müəllim də, öz növbəsində, Tahir Süleymanovu 75 illik yubileyi  və 1-ci dərəcəli “Vətənə xidmətə görə” ordeni ilə tətif olunmağı münasibətilə səmimi-qəlbdən təbrik edib, ona uzun ömür, möhkəm cansağlığı, gərəkli fəaliyyətində uğurlar arzulayıb. Qeyd edib ki, Tahir müəllim 20 illik səmərəli deputatlıq fəaliyyəti  zamanı Milli Məclisdə bir çox mühüm qanunların qəbul olunmasında, o cümlədən komitələrin, parlamentlərarası işçi qruplarının və nümayəndə heyətlərinin işində yaxından iştirak edərək parlamentin fəaliyyətinə böyük töhfələr verib. Tahir Süleymanov Azərbaycanın həlledici tarixi məqamlarında həmişə milli və dövlət maraqlarını üstün tutaraq, xalqa və Ulu Öndər Heydər Əliyevin siyasi kursuna sadiqlik nümayiş etdirib, ölkə Prezidenti cənab İlham Əliyevin Vətənimizin gələcək tərəqqisinə, iqtisadi yüksəlişinə istiqamətlənmiş uğurlu siyasətini qətiyyətlə dəstəkləyib. Natiq onu da əlavə edib ki, Tahir müəllim bu gün də Azərbaycan Ağsaqqallar Şurasının sədr müavini olaraq nümunəvi fəaliyyəti ilə xalqımıza, dövlətimizə böyük xidmətlər göstərir, cəmiyyətimizin inkişafında, gənclərimizin Vətənə məhəbbət, milli-mənəvi dəyərlərimizə, adət-ənənələrimizə hörmət ruhunda tərbiyə edilməsində üzərinə düşən vəzifələri layiqincə yerinə yetirir.
 Bütün tədbir iştirakçıları da Tahir Süleymanovu 75 illik yubileyi və 1-ci dərəcəli “Vətənə xidmətə görə” ordeni ilə təltif olunmağı münasibətilə ürəkdən təbrik edərək, ona sağlam həyat, cəmiyyətimiz üçün nümunə olan ömür yolunda və gələcək işlərinə yeni-yeni nailiyyətlər diləyiblər.
Sonra Eldar Quliyev Tahir Süleymanovu Şuradakı səmərəli fəaliyyətinə görə və 75 illik yubileyi münasibətilə Azərbaycan Ağsaqqallar Şurasının “Fəxri Ağsaqqal” döş nişanı ilə təltif edib. Həmçinin yubilyara Azərbaycanın Əməkdar rəssamı Rza Avşar tərəfindən çəkilmiş portret rəsmi və dgər hədiyyələr bağışlanıb.
Azərbaycan Ağsaqqallar Şurasının sədr müavini Tahir Süleymanov ona göstərilən diqqətə, xoş sözlərə və gözəl arzulara görə hər kəsə öz təşəkkürünü bildirərək, onun fəaliyyətini yüksək dəyərləndirən Azərbaycan Respublikasının Prezidenti cənab İlham Əliyevə dərin minnətdarlığını ifadə edib. Bildirib ki, ona göstərilən bu diqqəti bütün Azərbaycan Ağsaqqallar Şurasına verilən yüksək qiymət kimi dəyərləndirir və  xoşbəxtdir ki, onun yubileyinin tamam olduğu ərəfədə milli Ordumuz müzəffər Ali Baş Komandan cənab İlham Əliyevin başçılığı altında apardığı antiterror əməliyyatında növbəti və qəti qələbəsini qazanıb. O da, öz növbəsində, fəaliyyət göstərdiyi hər bir sahədə Vətənimizin daha da çiçəklənməsi naminə bundan sonra da var qüvvəsi ilə çalışacağını qeyd edib.
Sonda xatirə şəkli çəkdirilib.