BOKS

-----------------

Boksçularımız Malik Həsənovla Mirşərif Kazımzadə Avropa Kubokunun yarımfinalına yüksəlib

Rinq ustalarımız bununla da ən pis halda turnirin bürünc medalını özlərinə təmin ediblər 

Monteneqronun Budva şəhərində boks üzrə keçirilən və Azərbaycan komandasının da qatıldığı Avropa kuboku davam edir. Azərbaycan Boks Federasiyasından verilən məlumata görə, 29 ölkəni təmsil edən 156 boksçunun medallar uğrunda mübarizə apardığı bu turnirin 4-cü günü yığmamızın üzvləri - Malik Həsənov (63,5 kq) və Mirşərif Kazımzadə (75 kq) üçün uğurlu keçib. Belə ki, startda Bartumey Roskovici (Polşa) mübarizədən kənarlaşdıran Malik Həsənov (63,5 kq) 1/4 finalda fransalı Lounes Hamraouinə də oxşar anlar yaşadıb və adını yarımfinalçılar sırasına yazdırıb. Boksçumuz yarımfinala yüksəlməklə ən pis halda bürünc medalı ğzünə təmin edib. Malik yarımfinal döyüşündə israilli Ahmat Ştivi ilə üz-üzə gələcək.

1/4 finalda Qabriel Debaniçə (Xorvatiya) qalib gələn Mirşərif Kazımzadə də yarımfinala yüksəlməklə eyni uğura imza atıb.  Qeyd edək ki, rəqibini 5:0 (30:27, 30:27, 30:27, 29:28, 29:28) hesabla məğlub edən Kazımzadə finala gedən yolda rusiyalı Cambulat Bijamovla münasibətinə aydınlıq gətirəcək. Yarımfinal görüşləri oktyabrın 13-də olacaq.

Yeri gəlmişkən, Avropa kubokunun bu günə təsadüf edən 5-ci günündə millimizin daha 3 boksçusu 1\4 final mərhələsində rinqə çıxacaq. Bu trioda yer alan boksçulardan Tayfur Əliyev (60 kq) erməni əsilli Arşak Tovmasyanla (Rusiya), Nəbi İsgəndərov (67 kq) Canluici Malanqa (İtaliya) ilə, Sərxan Əliyevsə (71 kq) Miroslav Kapulerlə (İsrail) qarşılaşacaq.

İNTİQAM Məmmədov