Şeytan izdivaca girib şellənir

Doğulur günbəgün neçə saxtalar.

Soyur dərimizi cəlladdan betər

Sapı özümüzdən olan " baltalar".

Yolçusu yolunu azır sərsəri

Nə bir işıq görür, nə bir it hürür.

Dönüb qaranlığa işıqlı dünya

Elə bu dünyada cəhənnəm görür.

Başımız, qolumuz, dilimiz varkən

Ümid gözləyirik Allahdan niyə?

Bəlkə üz döndərib Allah da bizdən

Onu da xoş gündə aldatdıq deyə.

Şeytan ortalıqda, göz qabağında

Günahkar axtarır hərə bir yanda.

Ya xoşdur köləlik, ya tilsimlənib

Girir izdivaca şeytanla sonda.

Beləcə gün keçir - zəmanə dönük

Örkəni uzundur, doğanağı dar.

Hələ bunlara da min şükür - deyib

Boğazında kəndir günahsız naçar.

Zaman öz işində, zaman tələsmir

Hardasa yenə də tərs külək əsir.

İllərdir qəlblərdə doğub boğulan

Arzular, istəklər yaman tələsir.

Şəhidi dirilər bu məmləkətin

Sinəsin " baltaya" sipər edəcək.

Yenidən şəhidlik qazanmaq üçün

Ya ölüm deyəcək, ya hürr deyəcək.

ƏLİSA QƏMGİN

13.01.2022