Gürcüstanda qəzaya uğrayan təyyarənin qara qutusu Türkiyəyə təhvil verilib

Noyabrın 11-də Gürcüstanda qəzaya uğrayan Türkiyə Hərbi Hava Qüvvələrinə məxsus C-130 hərbi nəqliyyat təyyarəsinin qara qutusu Türkiyəyə təhvil verilib.

Bu barədə "Yeni Şafak" qəzeti məlumat yayıb.

Gürcüstan Daxili İşlər Nazirliyi Türkiyə Silahlı Qüvvələrinə məxsus C-130 hərbi nəqliyyat təyyarəsinin Gürcüstanın şərqində qəzaya uğraması ilə bağlı aparılan istintaqın ilkin nəticələrini açıqlayıb.

İlkin hesabata görə, təyyarədə partlayış və ya xarici təsir əlamətləri aşkar edilməyib.

İlkin vizual yoxlama zamanı təyyarənin gövdəsində xarici zərbə, dəlik və ya yanma izləri aşkar edilməyib.

Mütəxəssislər qeyd edirlər ki, təyyarə raketlə vurulsaydı və ya daxili partlayış baş versəydi, bu cür əlamətlər aydın görünərdi.

Mütəxəssislərin fikrincə, qəza ilə bağlı iki əsas nəzəriyyə mövcuddur. Birincisi, uzun müddət davam edən korroziyanın gövdəni zəiflədə və təyyarəni təzyiq dəyişikliklərinə qarşı həssas edə biləcəyidir. İkinci nəzəriyyə isə yükün kifayət qədər bərkidilmədiyini və uçuş zamanı təyyarədə tarazlığın pozulmasına səbəb olduğunu göstərir.