Məmməd Əvəzoğlu:

O mən olmuşam

Hansını bənzədim özüm özümə,

Şəkildən cavanlıq baxır üzümə,

Qocalıq aynada girir gözümə,

İllər ötüb deyə, belə solmuşam?

Görəsən doğrudan o mən olmuşam?

 

 

Günlər açılardı nurlu səhərlə,

Birtəhər dil tapdıq köhnə şəhərlə,

Yaşadıq bəxtəvər qəhqəhələrlə,

İndi bir gülüşə həsrət qalmışam,

Görəsən doğrudan o mən olmuşam?

 

 

Şəkil xatirinə qaçardıq dərsdən,

Dalğa üstümüzə cumardı qəsdən,

Çılğın qağayılar duyardı səsdən,

Gecə sevgilimçün gül də yolmuşam,

Görəsən doğrudan o mən olmuşam?

 

 

Ləpələr sıldırım daşı yalardı,

Qızların saçını külək yolardı,

Hər baxış ürəyə naxış salardı,

Hansı çox gözəldi, hələ çaşbaşam...

Görəsən doğrudan o mən olmuşam?

 

 

Cavanlıq şəkildə dönüb heykələ,

Gəlməz o günlərim bir daha ələ,

Axı şəkillərdə cavanam hələ,

Niyə aynalarda yaşa dolmuşam?

Görəsən doğrudan o mən olmuşam?

Məmməd Əvəzoğlu.18.03.2026.