Moldova Parlamenti yekun oxunuşda MDB-dən çıxmağı təsdiqlədi

Moldova Parlamenti ikinci və son oxunuşda MDB müqaviləsini və Birlik Xartiyasını ləğv edən qanunları qəbul etdi.

Cümə axşamı günü hakim Fəaliyyət və Həmrəylik və Evdə Demokratiya partiyalarından olan 101 millət vəkilindən 60-ı, eləcə də keçmiş Baş nazir İon Çiku (Alternativ fraksiyasından) bu qərarların lehinə səs verib.

Kommunist Partiyasından və Sosialist Partiyasından olan millət vəkilləri müqavilələrin ləğvinə qarşı səs verərək, "Moldovanın MDB-dən çıxmasının ölkə iqtisadiyyatı üçün fəlakətli nəticələrə səbəb olacağını" bildirdilər.

Bu müqavilələrin ləğvi Xarici İşlər Nazirliyi tərəfindən təşəbbüs göstərilib və o, MDB-nin fundamental dəyərlərinə və prinsiplərinə hazırda Birliyin bəzi üzvləri tərəfindən hörmət edilmədiyini iddia edir. "Bundan əlavə, MDB müqaviləsinin ləğvi Avropa İttifaqına qoşulmaq məqsədinə çatmaq üçün təbii və qaçılmaz bir addımdır", - deyə Xarici İşlər Nazirliyinin izahat qeydində bildirilir.

Moldova artıq 283 MDB müqaviləsindən 71-ni ləğv edib və təxminən 60-ı nəzərdən keçirilir. Parlament bunu milli siyasətlərin uyğunlaşdırılması və ölkənin qanunvericilik və iqtisadi çərçivəsinin Avropa Birliyi standartları və normaları ilə modernləşdirilməsi üçün zəruri addım kimi izah edir.

Moldova Prezidenti parlament qanunlarını imzaladıqdan sonra Xarici İşlər Nazirliyi bütün sənədləri MDB İcraiyyə Komitəsinə təqdim edəcək və Vyana Konvensiyasına uyğun olaraq Birlikdən çıxma 12 ay sonra başa çatacaq.