Tehran beş ərəb ölkəsindən dəymiş ziyana görə kompensasiya tələb edib

İranın BMT-dəki daimi nümayəndəsi Əmir Səid İrəvani ABŞ-İsrail əməliyyatı nəticəsində İrana dəyən ziyana görə Bəhreyn, Səudiyyə Ərəbistanı, Qətər, BƏƏ və İordaniyadan təzminat tələb edib, çünki əraziləri İslam Respublikasına zərbə endirmək üçün istifadə edilib.

İrəvani BMT-nin Baş katibi Antonio Quterreşə göndərdiyi məktubda bildirib ki, "Bəhreyn Krallığı, Səudiyyə Ərəbistanı Krallığı, Qətər Dövləti, Birləşmiş Ərəb Əmirlikləri və İordaniya Haşimilər Krallığı beynəlxalq qanunsuz hərəkətləri nəticəsində dəyən bütün maddi və mənəvi ziyanlar da daxil olmaqla, İran İslam Respublikasına dəyən ziyana görə tam kompensasiya ödəməlidirlər".

İran tərəfi bu tələbi ABŞ-nin İrana qarşı əməliyyat zamanı bu ərəb dövlətlərinin "ərazilərindən" onların icazəsi ilə "İslam Respublikasına qarşı təcavüz aktları həyata keçirmək" üçün istifadə etməsi ilə əlaqələndirir.

İrəvani vurğulayıb ki, "bu dövlətlərin öz ərazilərinin təcavüzkarlar tərəfindən İran İslam Respublikasına qarşı istifadəsinə icazə verməkdən ibarət davranışı təcavüz aktı kimi qiymətləndirilir".

Məktuba görə, bu ölkələr İrana qarşı "beynəlxalq öhdəliklərini pozublar".