Azərbaycan və Mərakeş hüquq sistemləri arasında əməkdaşlığı genişləndirir

Baş prokuror Kamran Əliyevin rəhbərlik etdiyi nümayəndə heyəti Mərakeşə səfəri zamanı ölkənin məhkəmə sisteminin nümayəndələri ilə əməkdaşlığın genişləndirilməsi və hüquqi təcrübə mübadiləsi məsələlərini müzakirə edib.

Baş Prokurorluğun mətbuat xidmətindən verilən məlumata görə, səfər çərçivəsində Kamran Əliyev Mərakeş Kassasiya Məhkəməsinin sədri və Ali Məhkəmə Şurasının vitse-prezidenti Məhəmməd Abdennabaui ilə görüşüb. Tərəflər hüquq sistemləri arasında qarşılıqlı faydalı və effektiv əlaqələrin genişləndirilməsinin vacibliyini vurğulayıblar və təcrübə mübadiləsi və qarşılıqlı hüquqi dəstək imkanlarını müzakirə ediblər.

Bundan əlavə, Baş prokurorun rəhbərlik etdiyi nümayəndə heyəti İslam Dünyası Təhsil, Elm və Mədəniyyət Təşkilatının (İSESKO) qərargahını ziyarət edib, baş direktor Səlim Əl-Malik ilə görüşüb və orada yerləşən Məhəmməd Peyğəmbərin həyatına həsr olunmuş muzeyi gəzib.