Paşinyan İlham Əliyevə təşəkkür etdi

Ermənistanın Baş naziri Nikol Paşinyan Azərbaycan Prezidenti İlham Əliyevə İrəvanda keçirilən Avropa Siyasi Birliyi Zirvə Görüşündə videokonfrans vasitəsilə iştirak etdiyinə görə təşəkkür edib.

Forumdan sonra çıxış edən o, Türkiyənin vitse-prezidenti Cövdət Yılmaza səfəri və tədbirdə iştirakı üçün təşəkkürünü bildirib və Türkiyənin sülh dialoqunun və regional əməkdaşlığın inkişafına verdiyi töhfəni qeyd edib. "Bu gün qitənin və digər ölkələrin liderlərini bir araya gətirən forum uğurla başa çatdı. Fürsətdən istifadə edərək, sammitin təşkilində sıx əməkdaşlığına və tərəfdaşlığına görə Avropa İttifaqına səmimi təşəkkürümü bildirmək istəyirəm... Həmçinin onlayn iştirak etdiyinə görə Azərbaycan Prezidentinə və sülh prosesləri və regional əməkdaşlıq baxımından iştirakına görə Türkiyənin vitse-prezidentinə minnətdaram", - deyə o bildirib.

Paşinyan vurğulayıb ki, Avropa İttifaqının dəstəyi ilə keçirilən sammit mövcud problemlərin müzakirəsi üçün platforma rolunu oynayıb və açıq dialoqun və praktik əməkdaşlığın vacibliyini bir daha təsdiqləyib.

Onun sözlərinə görə, iştirakçılar Cənubi Qafqazda regional inteqrasiya və sülhün və sabitliyin möhkəmləndirilməsi perspektivlərinə xüsusi diqqət yetiriblər. Baş nazir əlavə edib ki, Azərbaycan və Türkiyə ilə münasibətlərin normallaşdırılması və sərhədlərin açılması təkcə regiona deyil, həm də daha geniş Avropa regionunda əməkdaşlığın genişləndirilməsinə fayda verə bilər.