Azərbaycanın ipoteka fondunun aktivləri 2 milyard dolları keçib

Azərbaycan İpoteka və Kredit Zəmanət Fondunun aktivləri 2 milyard dolları keçib.

Bu barədə WUF13-də keçirilən "Mənzil Maliyyələşdirilməsi üçün Yeni Saziş" sessiyasında Azərbaycan maliyyə nazirinin birinci müavini Anar Kərimov məlumat verib.

Onun sözlərinə görə, Azərbaycan mənzil maliyyələşdirmə modeli dövlət dəstəyini kapital bazarının maliyyələşdirmə mexanizmləri ilə birləşdirir.

Anar Kərimov qeyd etdi ki, Azərbaycan İpoteka və Kredit Zəmanət Fondu hazırda 2 milyard dollardan çox aktivləri idarə edir.

O, modelin sosial cəhətdən həssas qruplara güzəştli ipoteka kreditlərinin verilməsini, eləcə də daxili kapital bazarında istiqrazların buraxılmasını əhatə etdiyini vurğuladı.

Nazirin birinci müavininin sözlərinə görə, subsidiyalı mənzil proqramları qaçqınları, məcburi köçkünləri, hərbçiləri, müəllimləri və şəhid ailələrini əhatə edir.

Kərimov həmçinin bildirib ki, mənzil sektorunun rəqəmsallaşdırılması əsas prioritet olaraq qalır. Ərizə, baxılma və təsdiq prosesləri tamamilə elektron formata keçirilib.

Bundan əlavə, o bildirib ki, "Böyük Qayıdış" proqramı çərçivəsində 2020-ci ildən bəri azad edilmiş ərazilərin bərpası və köçürülməsi üçün artıq 10 milyard dollardan çox vəsait ayrılıb.