Rusiyalı milyarder avtomobil qəzasında ölüb

Milyarder Mixail Smirnov Rusiyada yol qəzasında həlak olub.

Bu barədə RBC-yə Baltic Fuel Company məlumat verib.

Daxili İşlər Nazirliyinin Sankt-Peterburq və Leninqrad vilayəti üzrə Baş İdarəsinin mətbuat xidmətindən verilən məlumata görə, qəza dünən saat 13:30 radələrində Priozersk rayonunda Peski-Sosnovo-Podqorye avtomobil yolunun 49-cu kilometrliyində baş verib.

İlkin məlumata görə, 1972-ci il təvəllüdlü "Triumph" motosikletini idarə edən kişi idarəetməni itirərək qarşıdakı zolağa çıxıb və "Haval" markalı avtomobillə toqquşub.

Qəza nəticəsində motosiklet sürücüsü təcili yardım gələnə qədər ölüb. Polis qəza ilə bağlı araşdırma aparır.