Azərbaycanın miniatür ruhunu yaşadan rəssam-Əli Seyran İmanzadə

Azərbaycan təsviri sənətinin müasir mərhələsində özünəməxsus bədii-estetik dünyası ilə seçilən rəssam Əli Seyran İmanzadə milli miniatür ənənələrinin çağdaş interpretasiyasını yaradan sənətkarlardan biridir.

Onun yaradıcılığı Şərq miniatür sənətinin incə poetikasını, Azərbaycan milli koloriti və müasir Avropa plastik düşüncəsini vahid estetik sistemdə birləşdirən nadir sənət hadisəsi kimi diqqət çəkir. Uzun illər Fransada yaşayıb-yaradan rəssam Qərb incəsənətinin fəlsəfi-estetik prinsiplərini dərindən mənimsəyərək, onları milli bədii təfəkkürlə sintez etməyə nail olmuşdur.

Əli Seyran İmanzadənin əsərlərində rəng yalnız vizual element deyil, həm də mənəvi məna daşıyıcısıdır. Onun tablolarında insan fiqurları, şəhər siluetləri, ornamental motivlər və simvolik obrazlar daxili harmoniya və poetik ritm içərisində təqdim olunur. Rəssamın yaratdığı obrazlar bəzən mistik, bəzən fəlsəfi, bəzən isə folklor yaddaşından gələn milli arxetiplər kimi tamaşaçı ilə emosional dialoq qurur.

Sənətkarın yaradıcılığı klassik ənənənin təkrarı deyil, onun müasir bədii təfəkkür prizmasından yenidən formalaşdırılmasıdır. Bu baxımdan Əli Seyran İmanzadənin əsərləri Azərbaycan təsviri sənətinin milli köklərə bağlı qalaraq beynəlxalq sənət məkanında inkişaf etməsinin parlaq nümunəsi hesab oluna bilər.

Rəssam müxtəlif beynəlxalq sərgilərin, sənət simpoziumlarının və yaradıcılıq platformalarının iştirakçısı olmuş, əsərləri xarici ölkələrdə şəxsi kolleksiyalarda və sənət fondlarında yer almışdır. Eyni zamanda onun yaradıcılığı Azərbaycan Miniatür Sənəti Muzeyi tərəfindən yüksək qiymətləndirilərək muzey fonduna daxil edilmişdir.

Əli Seyran İmanzadə bu gün də milli miniatür sənətinin qorunması, inkişaf etdirilməsi və yeni nəsillərə ötürülməsi istiqamətində ardıcıl yaradıcılıq fəaliyyətini davam etdirir. Onun sənəti milli ruhun, estetik yaddaşın və müasir bədii düşüncənin harmonik vəhdəti kimi Azərbaycan mədəniyyətində xüsusi yer tutur.

Rüstəm Fərman