Fərhad Rəcəbli 11 qat Avropa çempionu 

Latviyanın paytaxtı Riqada veteran cüdoçular arasında keçirilən və Azərbaycandan olan ustadların da iştirak etdiyi Avropa çempionatı başa çatıb. 23-25 may günlərində təşkil edilən çempionatda Azərbaycanla yanaşı, 37 ölkəni təmsil edən 855 "qoca" medallar uğrunda mübarizə aparıb. Turnirə 32 ustadla qatılan Azərbaycan yığması çıxışını 5-i qızıl, 2-ci bürünc əyarlı olmaqla 7 medalla başa vurub. Bu göstərici ilə yığmamız ümumi komanda hesabında 5-ci yeri tutub.

 Çempionatın ən maraqlı məqamlarından biri "köç qocaman" ustadımız, 12 qat dünya çempionu adını daşıyan və M-8 versiyasında çıxış edən Fərhad Rəcəblinin (90 kq) 11-ci dəfə Avropa çempionu adını qazanması olub. O, həlledici finalda ukraynalı Oleksandr Rancayevi məğlub edib. 

Qazanılan digər medallara gəlincə, yığmanın heyətində yeganə qadın cüdoçu olan Zülfiyyə Hüseynova (F-6, 70 kq), Babək Hacıyev (M-4, 60 kq), Vaqif Kərimov (M-4, 73 kq) və Emil Hüseynov (M-4, 100 kq) bütün görüşlərini qələbə ilə başa vuraraq qızıl medal qazanıb. Yığmamızın aktivinə yazılan iki bürünc isə müxtəlif çəkilərdə çıxış edən eyni adlı və soyadlı cüdoçuların - Samir İsmayılov (M-1, 73 kq) və Samir İsmayılov (M-3, 81 kq) payına düşüb.

İNTİQAM Məmmədov