Əlisa Qəmgin:

BU DAĞLAR

İnsan oğlu qovhaqova düşsə də,

Öz əhdinə sadiq qalır bu dağlar.

Ucaldıqca ucalığın önündə

İlahiyə səcdə qılır bu dağlar.

 

Asta-asta dolaşdıqca vətəni

Saf havası məst edəcək hey səni

Hüzuruna xoş məramla gələni

Xoş ovqatla yola salır bu dağlar.

 

Həm həkimdir, həm təbibdir, həm loğman

Belə yazıb ta əzəldən bəxt yazan

Baş ağrısa, can ağrısa -- hər zaman

Bədənindən ağrın alır bu dağlar.

 

Dad üstündən dad gətirir aşına

Fikir verməz gələnlərin yaşına

Baş qoydun ki, torpağına, daşına

Həzin-həzin layla çalır bu dağlar.

 

Gözəlliklər verib burda baş-başa

Göz gərəkdir edə ona tamaşa

Ərənləri yollananda savaşa

Dayaq olur, arxa olur bu dağlar.

 

Bu dağlarım namərdlərdən bac alır

Bac aldıqca qətrə-qətrə ucalır

Kim deyər ki, dağlarımız qocalır

Qəmgin kimi yaşa dolur bu dağlar.

ƏLİSA QƏMGİN

04.05.2021