Qara dənizdə qədim tikilinin fraqmentləri tapılıb

Arxeoloqlar Abxaziya sahillərində, ehtimal ki, orta əsrlər dövrünə aid qədim tikilinin fraqmentlərini və qədim amforaları tapıblar.

Arxeoloqlar dalğıcları cəlb etməklə Qudauta və Suxum (Abxaziya Respublikası) şəhərlərinin sularını tədqiq ediblər. Ən maraqlı tapıntı Suxumi körfəzində, Besletka çayının mənsəbində tapılıb.

“Bu ərazidə 2,4 m dərinlikdə yarımdairəvi strukturun hörgü qalıqlarını aşkar etdik. Çox güman ki, bu, əlavə divarları olan bir qüllədir. O, əhəng məhlulu üzərində iri çınqıllardan hazırlanıb, hörgüdə keramika var”, - Rusiya Elmlər Akademiyasının Şərqşünaslıq İnstitutunun Krımşünaslıq Mərkəzinin rəhbəri, tarix elmləri namizədi Viktor Lebedinski bildirib.

Bundan əlavə, arxeoloqlar akvatoriyada qədim və orta əsrlərə aid gəmilər aşkar ediblər. Məsələn, sahildən 4,5-5 km məsafədə 48-50 m dərinlikdə, çox güman ki, qəzaya uğramış gəminin yükünün bir hissəsi olan amfora tapıldı.

Lebedinskinin sözlərinə görə, ekspedisiya zamanı alimlərin araşdırmalarını davam etdirəcək 11 potensial maraqlı sualtı obyekti müəyyən etmək mümkün olub.