"Neftçi" VK səfərdə "Xilasedici"ni, "MAA" isə evdə "Gənclər"i məğlub edib
Dünən həm kişilərdən, həm də qadınlardan ibarət klubların mübarizə apardığı Azərbaycan çempionatının Yüksək Liqasında oyunlar keçirilib. Kişilər arasında 9-cu tur çərçivəsində "Xilasedici" - "Neftçi" qarşılaşması baş tutub. FHN-in idman zalında baş tutan və tay-brekə qədər uzanan oyunda qələbəyə sevinən qonaq komanda olub - 2:3 (25:22, 25:17, 22:25, 23:25, 15:17).
Eyni gündə "Milli Aviasiya Akademiyası" klubunun idman zalında eyniadlı komanda ilə "Gənclər" arasında 7-ci turdan təxirə salınan oyun keçirilib. Qarşılaşma ev sahibinin qələbəsi ilə bitib - 3:0.
Qadınlar arasında isə 8-ci turdan təxirə salınan "AZERRAİL" - "ORDU" görüşü keçirilib. Oyun ikincinin qələbəsi ilə başa çatıb - 1:3.
Bu gün isə kişilər arasında daha bir oyun keçiriləcək. "Gənclər klubu "Murov Az Terminal"la qarşılaşacaq.
İNTİQAM Məmmədov
